Skip to main content

Plattdüütsch-Filmpries 2020

In de meisten Films kiekt sik de Jungs un Deerns jüm ehr School an un allens wat dor rund üm to so los is. Se befraagt de Lüüd, geevt jüm ehr egen Menen dorto, singt Leder un speelt korte Speelstücken. Mal sünd dor junge Lüüd to sehn un to hören, de dat Plattdüütsche von tohuus ut op de Tung kregen hebbt, mal sünd dat Schoolklassen, de mit Spaaß un Freid Platt lehren doot.

De Plattdüütsch Stiften Neddersassen will den Filmpries 2022 wedder utschrieven.

De Priesträger

Grupp A: Schoolklassen 1 bet 4

De 1 Pries an de Grundschool Mühlen

Lüdtke Plattsnackers wiest jau Mühlen“, so heet de Film, de bi den Filmpries 2020 wunnen hett. De Platt-AG van de Grundschool St. Antonius in Mühlen freit sik över en Priesgeld van 250 Euros.

Josef Grave van de Stiftungsvörstand bi de Plattdüütsch Stiften Neddersassen hett den Pries an de Schoolmestersche Melanie Schypke un ehr Mini-Plattsnackers mit veel warme Wöör övergeven.

Al de Schölers ut en drüdde Klass sünd bi den Film „Bi uns in Möhlen“ mit bi. De ganze Klass is mit veel Spaaß un Freid dorbi, mit veel Kuroosch verkloort se, wo se herkamen doot.

Plattdüütsch is bi’t Singen, bi’t Verklaren, bi’t Vördrägen mit. Enkelte Deerns un Jungs hebbt verscheden Rullen un modereert, speelt un vertellt.

In den Film worrt verscheden Steden in de School un in‘t Dörp op ganz verscheden Oort anstüert. Van dat Schooljubiläum bet hen na den bekannten Peerhoff Schockemöhle. Dör den Film kiekt de Schölers op en anner Oort op jüm ehr Dörp, man se nehmt ok dat mit wat de Film kann: de ganze Grupp oder en Deel dorvan, grote Opnahmen oder blots en lütten Utsnitt, singen un spelen mit de ganze Klass, snacken un vertellen mit enkelte Schölers.

So verscheden de Film ok is, dat passt tohoop. De School blifft in’t Dörp un wo se dat deit, dat kann een in den Film sehn.

Grupp B: Schoolklassen 5 bet 13

Grupp C: Fre'e Gruppen, enkelte Bidreger

De 1. Pries an de KGS Norden

De Wahlplichtkurs ut den Johrgang 8 an de Kooperative Gesamtschool KGS Hage-Nörden freit sik över den eersten Pries bi den Filmpries 2020. „En Gang dör uns School“ heet de Film.

De Film „En Gang dör uns School“ wiest Schölers in en Plattdüütsch-AG, de in verscheden Rullen Lüüd ut de School un de School sülvst vörstellt. Ok wenn de School-Baas düütlich maakt, dat he keen Platt snacken deit, wiest de Film liekers, dat de ganze School ok wat mit Platt to kriegen hett.

Tominnst en poor Dele van den Film sünd in de „Corona-Tiet“ opnahmen worrn. Schölergruppen sünd dor nich bi un ok de Lüüd vör dat Mikrofon maakt blots enen Deel ut van dat, wat wiest warrn schull. Liekers is de Film, so nöchtern dat ok schienen mag, en Dokumentarfilm, de overtügen deit.

De School is as „Plattdüütsche School” van den Neddersassischen Kultusminister uttekent worrn un bringt en ganze Reeg Projekte op’n Weg. So gifft dat een üm anner Johr enen Wahlplichtkurs „Platt“ in den achten Johrgang, man ok in den sössten Johrgang schall sowat anbaden weern. De Schoolmesterschen Imke Schöneboom un Andrea Boedtger staht för de Projekte praat. Fro Schöneboom ünnerricht in de Johrgangsstufen fief un söss ok in dat Fack Sport dörgahns op Platt. Se is Plattdüütschberadersche bi dat Lannesschoolamt un hett vele Kontakte na anner Scholen. Mit vele arbeidt se ok eng tohoop.

De KGS Hage-Nörden het noch mehr Filme inschickt un enen Förderpries von 50 Euros för jedeen Film kregen. Dat Gesamtpriesgeld van 400 Euros schall för enen Uttuusch van de Platt-Wahlplichtkurse an de KGS Hage-Nörden un de KGS Edewecht insett weern. Dorbi wöllt se ok en original Waffeliesen inköpen, wat se för de plattdüütsche Teetiet insetten wöllt.

De 1. Pries an Marvin Sander

Marvin Sander van de Hugo-Friedrich-Hartmann-Oberschool in Bardowick is twölf Johr oolt un hett mit sienen Film „In Tieden van Corona“ bi de „Freen Gruppen“ den eersten Pries wunnen un mit sien Idee dat drapen, wat vele Lüüd jüst nu föhlen doot.

Marvin Sander hett sik sülvst en Geschicht utdacht. Woans he dat in sienen Film ümsett hett un wo he de Spraak bruukt hett, dat wöör bannig goot.

In sienen Film „In Corona-Tieden“ vertellt Marvin en Geschicht, de he sik sülvst utklookt hett: mit enkelte Biller, de he to’n Lopen bringt, wiest he Kinner op’n Speelplatz – wo se nich ween dröfft. De Corona-Polizeit geiht dor gegen an, steekt de Kinner in en Unfallwagen un nimmt jüm mit.

Marvin, 12 Johr oolt, hett de Geschicht in en Filmkulisse mit Playmobil-Figuren anleggt un mit egen Spraak op Platt ümsett.

Corona worrt hier to dat Thema in den Film. So aktuell un düüster dat Thema is, so bunt un mit veel Fantasie malt he de Geschicht. Junge Lüüd köönt jüm ehr egen Alldag wedderkinnen un mit mit dissen Film en Stück wiet över Corona wegkieken.

Presseartikel