Andrag op Fördern

De Plattdüütsch-Stiftung Neddersassen warkt för nix anners as för de Gemeenschap. De Stiftung hölpt un stütt blots in Neddersassen. De Stiftung fördert Projekten bi de een de Regionalspraak Nedderdüütsch lehren, plegen, wietergeven, ünnersöken un ünner de Lüüd bringen deit. Dat Geld vun de Stiftung dröfft blots för dat insett warrn, wat in de Statuten steiht. Dorüm mütt de Stiftung dorop kieken, wat se dat Geld spoort un wohrt. De Lüüd, de Geld vun de Stiftung hebben wöllt, schöllt kieken, wat se ok jemehr egen Geld insett un bi anner Steden Hölp kriegt. De Plattdüütsch Stiftung kann ok tohoop mit anner passliche Partners Hölp un Stütt geven.

De Stiftung hölpt nich op Duer. Se kann aver, wenn dat Noot deit, länger as een Johr Stütt geven un ok mehr as eenmal in verscheden Johren fördern.

• Projekten in Neddersassen, de nix mit Plattdüütsch to doon hebbt
• Wat op de Been stellen, wo Lüüd Geld mit verdenen wöllt
• bi de Kösten, de Johr för Johr bi de Verene oploopt
• allens, wat mit dat Boen tohoophangt
• Priese, Wettbewarven un Stipendien vun anner Steden
• Plichtopgaven vun Stiftungen un anner Personen vun dat öffentliche Recht
• allens, wat buten de Förderstatuten vun de Stiftung liggt
• allens, wat buten vun Neddersassen plaant is
• allens, wat al trecht is

För dat, wat in tokamen Tiet lopen schall, köönt wi vörher nix seggen. De Andrääg, de aflehnt worrn sünd, dröfft nich noch eenmal stellt warrn.

Andrääg stellen köönt al de natürliche Personen un juristische Personen, so as Verene un Stiftungen, de in Neddersassen indragen sünd. Dat, wat se sik vörnehmt, mütt dor ümsett warrn, woneem de Stiftung tohuus is.

En Andrag mütt op Papeer stahn un schickt warrn an

Plattdüütsch-Stiftung Neddersassen
c/o Kreissparkasse Stade
Große Schmiedestraße 12
21682 Stade

oder över de/den Landschaft/Landschaftsverband stellt warrn, woneem de, de den Andrag stellt, to Huus is.

Wat to den Andrag tohören deit

• dat akraat opschreven warrt, wo sik dat üm dreiht, wat för en Idee dor achter stickt un woans dat aflopen schall,
• dat akkeraat oplist is, wat dat to kösten warrt: Wat warrt anschafft, woveel kann een op en Reken opschrieven, wo veel Geld fallt för de Lüüd an,
• En Plaan, wo opschreven is, woans dat Projekt betahlt warrn schall: Wo veel egen Geld geiht dor rin, wat an egen Arbeit geiht dor rin, wo veel Geld kümmt vun anner Steden un wat för Steden sünd dat, woveel Geld warrt mit dat Projekt innahmen?

Över den Andrag beslutt de Vörstand vun de Stiftung.

All de, de enen Andrag an de Plattdüütsch-Stiftung stellt hebbt, kriegt mit de Post oder dör dat Telefon to weten, wat de Andrag annahmen oder afseggt warrt. Wenn dat toseggt warrt, kann dat ween, dat dor noch wat bavento kümmt, wo de Lüüd sik na schicken mööt. Wenn de Andrag afseggt warrt, warrt nich seggt, woso.

Wenn bi dat Projekt verkehrt opschreven warrt, wo veel dat kösten schall, wo dat Geld herkümmt, oder wenn nich recht angeven worrn is, för wat dat Geld bruukt warrn schall, oder de Oplagen vun de Stiftung nich inhollen warrt, kann de Stiftung dat Geld, wat toseggt worrn is, trüchholen oder wenn al wat utbetahlt is, dat ok wedder trüchverlangen.

Wenn Geld för en Projekt dör de Stiftung toseggt worrn is un de, de den Andrag stellt hett, will bi dat Projekt wat anners maken, mütt de Stiftung dor eerst tostimmen.

De Plattdüütsch-Stiftung kann över Projekten, de se Hölp un Stütt geven hett, ok anner Lüüd wat to weten geven.

De Plattdüütsch Stiftung Neddersassen kickt dorna, dat de Lüüd un Verene, de för jemehr Projekten Geld vun de Stiftung kregen hebbt, dat ok över de Zeitung un de Medien an all de Lüüd wieter dräägt, de dat wiet un siet angeiht. Wo dat jümmer geiht, höört ok de Henwies op de Plattdüütsch-Stiftung Neddersassen mit dat Logo dorto.

Wenn in de Medien wat över en Projekt lopen is, schöllt düsse Berichte de Plattdüütsch-Stiftung tostüert warrn.