De Plattdüütsch Filmpries 2022

Filmwettstriet – Vun Klass 1 op an (6 Johr)

De „Plattdüütsch Stiften Neddersassen“ schriftt to’n drüdden Tuur en Filmföderpries för dat ganze Land ut. Dorto sünd all de Schölers, Kinner un junge Lüüd mit Kuraasch opropen, dat se en korten Film op Platt trechtstellen doot.

Ji köönt jo utsöken, wat ji as Klass, as Film-AG, as Hobby-Grupp oder sogor alleen mitmaken wöllt. Wi freit uns op dat, wat ji uns toschicken doot.

As Partner för dat Filmprojekt is ok in düt Johr wedder dat Institut för nedderdüütsche Spraak mit bi. De Lüüd in’t Institut köönt op all de Fragen to den Wettstriet en Antwoort geven, egal wat dat üm de Technik oder de Spraak geiht. Se nehmt ok de Bidrääg to den Wettstriet an.

Inschicken schullen ji de Bidrääg bet to den 4.Mai 2022.

Wat ji weten mööt!

Joon Idee!

Villicht hebbt ji al bi dat Lesen vun dissen Text en Idee, wat för en Thema för en Film to den „Plattdüütschen Filmpries 2022“ passen kunn. Wenn nich, sett jo tohoop un klookt jo dat ut. Dat maakt nich blots Spaaß, nee dorbi köönt ok de Ideen man eenfach so hen un her flegen.

Ideen utkloken un ümsetten

Man du kannst ok alleen Regisseur, Licht- un Tontechniker warrn un en Dreihbook schrieven. Op jeden Fall maak den Film trecht, dat de nich linger as fief Minuten duert un stüer uns den Bidrag to.
En Jury söcht de besten Filme ut un laad de Siegers to en Priesverdelen in.

Pries un Jury

De Pries warrt in veer verscheden Öllersgruppen utdeelt. En Jury leggt fast, wat dor en Geschicht vertellt worrn is, wat de Lüüd dorbi ok wat maken doot un woans de Film opboot is un wat allens dat, wat de Kamera wiest, ok düütlich warrt. De Öllersgruppen sünd:

  • Grundschölers / Kinner bet 10 Johr
  • Klassen 5 – 10 / 11 – 16 Johr
  • Klassen 11 – 13, Beroopsscholen / 16 – 25 Johr
  • Free Gruppen, Theatergruppen, kreative Gruppen bet 25 Johr

Dat Priesgeld maakt tohoop 1800 EUR ut.

Wenn een mitmaken will

Fördert warrt: Kortfilme, Dokumentatschonen, Reportagen, Trickfilme, Gifs, Video-Podcasts, Verkloor-Videos oder Filme, de Tokiekers op Platt wat biböögt, wat junge Lüüd den Weg na de plattdüütsche Spraak lichter maakt oder henwiest. De Filme schullen wat mit Spraak un Region to kriegen hebben.

Pass op: De Film dröff nich linger as 5 Minuten ween!

Wenn de Film trecht is, schall de in een vun düsse Formaten tohoop mit en Anschrieven na dat INS henschickt warrn:

• Video-Datei (z.B. mpg2, mp4, avi, mov, wmv)
• Op en Spieker vun Daten
• Över en Deenstleister, de de Daten online verschicken deit (WeTransfer, Dropbox, Vimeo, etc.)

De Rechten kloor hebben!

Dinkt doran, dat ji to rechten Tiet de Rechten inhaalt vun de, de sik Musik oder anner Ideen ut den Film utdacht un alleen bestimmen köönt, wokeen dat koperen oder annerwegens insetten dröfft. Laat jo dat ünnerschrieven. För de Musik kunn de GEMA Antwoort geven. Wo süht dat mit de Rechten an Billers ut un mit Texten vun anner Lüüd, de ji mit opnehmt?
Dor blangen gifft dat en ganze Reeg vun Musik in’t Nett, för de ji keen GEMA-oder Lizenzgeld betahlen mööt.

Dinkt ok an dat Recht vun de Daten, de jeedeen hett: Hebbt ji vun all de Lüüd, de ji in den Film mit opnahmen hebbt, Verlööf kregen, dat ji jüm filmen dröfft, dat ji den Film vvör all de Lüüd wiesen dröfft un de Film ok in’t Nett stellt warrt, so dat jeedeen dor online op togriepen kann?

Allerbest! Denn sünd ji al meist hen.

Priesverdelen

De Siegerbidrääg warrt an’t Enn vun’t Schooljohr 2021/22 uttekent. Ünnerlagen för den Filmpries hendaalladen: Institut för nedderdüütsche Spraak e.V.